【Viu】GiGi梁詠琪完成三場紅館騷《梁詠琪時間遇上我們》，尾場有Sammi鄭秀文做嘉賓，兩個黑白雙煞咁亮相合唱，好正！GiGi完騷後受訪，台上佢有講籌備演唱會一度懷疑自己，GiGi指係排舞部分，事前用咗約兩個月時間、出盡200分努力辛苦練習，幸獲老公Sergio金句鼓勵。GiGi搞笑篤爆囡囡Sofia呷醋，被「投訴」冇喺台上多謝佢支持，GiGi笑話會重回媽媽身分接放學補償。
提起三晚嘅撐場嘉賓，GiGi感謝佢哋特別練唱，又點名大讚「阿仔」Edan 100分，而同Sammi鄭秀文、張敬軒已經養成默契舞台「約會」。
至於商台DJ梁文禮睇完頭場後，一邊廂喺ig story讚GiGi「好靚」，另一廂卻用私人Facebook account狠批GiGi演出，力數流程、編曲、跳舞、唱功、服裝差，甚至彈GiGi開騷離譜到似唱k，被網民鬧爆係雙面人。GiGi大方回應每個作品都會有人鍾意、唔鍾意，每個人都會有自己嘅期望同標準，又承認自己各方面都有好大嘅進步空間，希望大家畀時間佢再做好啲，對答超高EQ！
其實GiGi開騷都有好多朋友嚟撐場㗎！好似佢嘅西班牙籍老公Sergio同囡囡Sofia三場都準時打卡，尾場座上嘉賓亦勁多對糖黐豆，包括王大陸同女友蔡卓宜、湯怡同老公麥秋成、泳兒同髮型師男友Ziv，另外仲有周秀娜、鄭融、何嘉莉等，一睇就知GiGi喺圈中人緣有幾好啦！
