【Viu】除咗Edan@MIRROR為GiGi梁詠琪擔任紅館騷特別嘉賓之外，「皇上」張敬軒亦大駕光臨，中途驚喜現身合唱《他喜歡的是你》，尖叫聲傳遍紅館！佢哋笑話每次約見面都係喺紅館舞台，寧舍高級！軒仔又抵死笑話一直企喺GiGi身後唔敢落一級，事關佢要保住男人嘅尊嚴，一平排企就即刻矮半個頭咁話！
之後軒仔提起中學嗰陣好鍾意睇GiGi套主演電影《初戀無限Touch》，又勁怕醜咁問GiGi點解喺賭台（拍完《賭神3之少年賭神》）之後就再冇留長頭髮？繼而大讚長髮look嘅GiGi靚過有「亞洲第一美女」之稱嘅王祖賢！GiGi聽到笑唔停，自爆亦曾被老公同個女要求留長頭髮，最後承諾會替軒仔圓夢添呀！
