【Viu】天后Sammi鄭秀文噚晚喺澳門舉行第二場《You & Mi鄭秀文澳門演唱會2025》，邀請林明禎擔任表演嘉賓。Sammi以「雙眼閃閃發光」介紹明禎出場，兩人合唱《親密關係》，並手拖手向四面觀眾打招呼。Sammi大讚明禎「電力十足」，「綵排嘅時候差啲俾你電到暈低。」明禎以廣東話表示：「我有準備禮物俾自己。」隨即展示一大袋Sammi嘅專輯表示：「我準備咗超多你嘅專輯，你嘅歌陪伴我每個人生階段。」明禎自肥請求簽名，Sammi即爽快應承。Sammi隨後將舞台交俾明禎，明禎帶同8位Dancers首次公開獻唱新歌《ON CLOUD NINE》，笑言為Sammi獻出第一次，贏得全場熱烈掌聲！

演出結束後，明禎坦言超緊張，「知道要唱呢首歌後，就一直練、一直練，但一上台見到Sammi，腦袋立即空白，很幸運可以同Sammi合唱，多謝邀請。」Sammi唔單止為明禎簽晒28張專輯，仲送上最新演唱會專輯《You & Mi 鄭秀文世界巡迴演唱會(Live)》，並即場為佢簽名，明禎興奮大叫「Oh！My God」。明禎感動答謝Sammi：「你嘅歌陪我走過人生很多階段，第一次愛上唱K係因為《眉飛色舞》，覺得很有意義，一定要得到呢次合作機會。」