【Viu】GiGi梁詠琪一連三場嘅紅館演唱會，噚晚(18號)嚟到第二場，GiGi唱跳《出走地平線》、《我鍾意》、《好時辰》等經典作品，炒熱現場氣氛！而呢晚嘉賓方面，邀請到陳蕾現身，兩人首先合唱《嫌棄》，之後GiGi好鬼馬咁以「陳蕾世一」稱呼對方，場面超搞笑！GiGi重提兩人早喺電影《骨妹》時已經認識，但當時冇咩對手戲，只係覺得對方好靜好怕醜，直到後來發現陳蕾嘅歌好好聽，先醒起曾經一齊拍戲！
GiGi私心揀咗陳蕾嘅《相信一切是最好的安排》一齊合唱！合唱完，陳蕾收起平日嘅霸氣變身小fans，自認係GiGi「天字第一號」鐵粉，仲話可以跟住全晚嘅rundown去唱，做嘉賓完全冇壓力，只需要簡單背一背歌詞，可能仲熟過GiGi本人添！最後，陳蕾呢位鐵粉仲成功爭取同GiGi合唱一晚限定嘅合唱版《膽小鬼》，係陳蕾8年前Busking時經常自彈自唱嘅作品，能夠喺紅館舞台上同GiGi合唱，真係別具意義啊！
