【Viu】七仙羽（七師傅）舉行一連兩場《師傅七都識唱笑會》，噚晚(12號)舉行首場演出，圈中好友杜如風同「下世老公」張敬軒都有送上花籃賀七師傅good show。七師傅喺台上話今次開騷係為咗普渡嫖客，仲自爆因為佛堂喺一樓一嘅樓上，佢曾經打扮到靚一靚去截糊，向啲嫖客頌經，希望普渡佢哋！但朋友話咁樣幫得幾多啊，所以師傅就諗咗條絕世好橋就係去九展普渡嫖客嘞，事關台下都好多嫖客喎，真係笑死啊！
而一向人緣好到爆嘅七師傅，當晚請到小薯茄嘅程人富、麗英，仲有艾粒、潘紹聰等擔任嘉賓，七師傅仲大講有味笑話，以青頭仔介紹艾粒同當奴出場，艾粒仲預備咗粉紅胸圍送畀七師傅，不過七師傅就嫌太細唔啱size嘞！以神秘嘉賓身份壓軸登場嘅欣宜就同七師傅手拖手唱出《女神》，之後七師傅送咗水晶能量塔俾欣宜，答謝佢咁忙都嚟撐場，而欣宜亦禮尚往來將手製皇冠送畀七師傅。
