【Viu】七仙羽、「鬼王」潘紹聰、郭奕芯、龐景峰同和泉素行，今日出席《師傅七都識唱笑會》記者會，師傅仲即席擲聖杯同加持大家，收嘢喇喂！七師傅話兩場唱笑會嘅內部認購已經爆滿，自己都一身飛債，但買唔到飛嘅朋友唔使擔心，因為ViuTV會轉播。七師傅預告會性感上陣，仲會應觀眾要求「拉低啲」，又話除咗今日出席嘅嘉賓會上台，仲邀請緊天王級嘉賓，目標包括MIRROR、ERROR同COLLAR，當然唔少得下世老公軒公啦，仲話同軒公已經去到傾錢嘅階段喇！
吓，乜兩公婆都要講錢㗎咩？七師傅就話自己好均真，數還數路還路，又猛數軒公嘅優點，自爆除咗軒公嘅新聞，所有新聞都冇睇，所以唔了解林二汶所信嘅「玄武財神」係乜東東，師傅答嘢真係叻呀！
