【Viu】林峯、胡子彤、German張文傑今日出席新片《九龍城寨之圍城》明星好友場，朱鑑然送上蛋糕賀老友子彤32歲生日。吳卓羲、楊茜堯、林夏薇、苗僑偉同太太戚美珍、黃浩然同張之亮導演等專誠捧場，卓羲仲為阿峯「破處派心」，除眼鏡時仲被「Chok峯」封為「吳Chok羲」，喺場內仲同曾傳緋聞嘅菊梓喬相隔幾行。

林峯、子彤同German笑認喺新片打出兄弟情，連帶劉俊謙可以組成「Kowloon 4」，有意出歌咁話，期待呀！打到周身傷嘅阿峯，自爆有返屋企賣慘呃阿女氹返，太太都唔敢睇呢套激烈打戲；子彤仲傷到下巴要縫十幾針，Respect呀！

至於卓羲笑言因為冇嘢撈而嚟撐場；茜堯就話推Job都要嚟；堂妹薇薇就話最想睇阿峯畀人打。咦，阿峯同卓羲Friend到咁，幾時再合作拍露股戲呢？聽吓佢哋親身解說啦，保證笑Cry！