【Viu】鄭欣宜一連三場「Between Us」紅館騷噚日（12日）尾場，吸引到張敬軒、Lokman楊樂文與女友Luxi甄吳露茜、COLLAR、On仔陳健安、黃淑蔓同樂隊Nowhere Boys主音陳維諾捧場。COLLAR及Lokman出現更令觀眾席哄動咗一陣，要工作人員幫手維持秩序。
可能係最尾一場，Joyce感觸都零捨大，不時俾大家感動到眼濕濕，全場觀眾仲送咗片心心海俾Joyce，真係好有愛呀！可能因為張敬軒做壞規矩，搞到噚晚啲觀眾唔願意走，連軒公本尊、許廷鏗、On仔等都不斷大嗌encore ，搞到欣宜最終要四度encore。
講起同呢晚嘅嘉賓許廷鏗合唱《好好戀愛》，Joyce直言好反胃，仲話兩人真係唔過電，而頭場邀請到Anson Lo做嘉賓，Joyce就話要多謝「奶奶」花姐嘅幫忙先成事，把口咁甜得唔得㗎!
