【Viu】Joyce鄭欣宜下個月開紅館演唱會喇，佢最近推出新歌《我地》，係繼《先哭為敬》之後，再次邀請彭秀慧執導MV，彭導特別為佢打造咗一個愛情故事，「第一次聽呢首歌已經好感動，好想拍成史詩式愛情故事，縱使有好多經歷和障礙，只要相信就有希望。」
Joyce話唯一拍過有愛情戲份就係彭導電影《29＋1》，而上次拍MV有男主角都差不多十年前啦，今次請到型男胡子彤擔任男主角同佢飾演情侶，兩個人手拖手穿過森林同山谷，又喺小芒草原奔跑，真係Sweet到爆！Joyce仲約埋子彤IG開直播睇MV首播，隔住螢光幕放閃，互嗌對方「男朋友」和「女朋友」，子彤搞到一向怕羞嘅Joyce紅都面曬呀！
