【Viu】Stephy鄧麗欣今日喺中環出席藝術展覽開幕禮，將3幅喺尼泊爾探訪時遇見嘅小朋友嘅畫作，捐出嚟做展覽！啱啱喺台灣拍完新歌mv返嚟嘅Stehpy，透露台灣男友都有返去探親順道嚟探班，問到有冇見家長，佢甜絲絲話一早見過啦，男友媽咪冇催婚亦冇話恨抱孫喎！
講返是非纏身，前Cookies成員Theresa傅寶誼(傅穎)之前受訪講到當年遭團員欺凌及排斥，而最近有Stephy朋友喺網上留言直指Theresa冇朋友因為「唔識社交又高敏」，引來Theresa留言反擊！Stephy首開腔回應話要清楚講返呢件事，「我朋友所有自己嘅行為、言論，完全並不代表我立場，佢都係成年個體，佢嘅選擇、行為、言論唔代表我，我當時見到都好詫異，有少少覺得失望，但佢係圈外人，作為朋友我有必要向受呢件事影響嘅所有人致歉，大家比啲空間佢，佢係圈外人不必要受呢啲壓力！」Stephy話呢位朋友之後知錯都有向佢道歉，明白對方因為情緒衝動而做咗啲衝動嘅事，但已發生亦冇辦法！
問到事件會唔會影響佢同Theresa嘅關係，Stephy避談謂：「關於呢啲新聞都講咗好耐，我嘅態度係唔需要解釋太多，認識我嘅人、共事過嘅人都知我為人，希望就返呢件事講返，之後唔好再滾落去！」問佢會唔會搵Theresa傾吓俾件事劃句號？Stephy又話好多流言蜚語佢控制唔到，自己好少去睇，都叫啲粉絲就算幾想支持都忍住唔好參與呢啲文字，免得越來越複雜，「由我入行至今，所有嘢都係工作行先，做好工作為目標，其他嘢唔想理太多！」
講到Theresa話曾被欺凌，網民猜測Stephy有冇參與其中？佢答：「呢啲字眼，同埋網上有啲太過份同埋已嚴重失實嘅指控，係好嚴重嘅，我公司已將啲言論存檔，必要時會交俾律師處理！」至於Theresa話被排斥時問Stephy，得到答案話「唔知呢！」Stephy話唔記得有呢個對話，如有呢個回答都一定唔係呢種語氣！至於欺凌矛頭直指區文詩，Stephy話事件實在發生太耐太多次，其他成員都有自己生活，唔希望煩到佢地，而佢地亦唔喺呢行唔會在意！
