【Viu】鄭伊健日前帶埋Feanna黃淑蔓同出道十年嘅樂隊Nowhere Boys，殺入新加坡環球影城戶外場地出席「JAM OFF 2025」音樂會，同場演出嘅仲有Stephy及韓流天王Rain。
話說伊健今次落足力，連唱《興波作浪》同《友情歲月》等多首經典金曲，唱到第二首歌已經頂唔順炎熱天氣，竟然當眾揭開西裝外套唞涼，大騷結實膊頭！台下fans即刻瘋狂尖叫，之後伊健仲落台同觀眾握手，仲要又跳又唱快歌，掀起全場高潮！
不過最搞笑係壓軸演出嘅Rain竟然提早到場，唔係為咗準備表演，而係專登嚟見偶像伊健！Rain一見到伊健，天王即刻變身小粉絲，用英文講：「細細個就睇你嘅戲，你係我偶像！」伊健即刻發揮「大佬」風範，向Rain逐一介紹Feanna同NWB成員！講到同Rain重逢，伊健都好感觸：「十幾年冇見，重逢真係好，原來經過時間洗禮，再見返真係得來不易。」
今次仲係NWB出道十年首次衝出香港，主音Van勁興奮話：「同香港睇騷文化好唔同，呢度觀眾好專心，唔會用手機拍片！」仲話雖然天氣「吸啖氣都好似吸蒸氣」，但完全無阻佢哋嘅熱情！至於Feanna就大爆伊健今次好似「扭開咗個掣」：「我發現今日鄭伊健好似唔同咗⋯⋯」伊健即刻搶答：「好熱情又帶點冷酷！」
