【Viu】女神Ali李佳芯今日孖住馬國明現身《譚仔三十周年美食巡禮展》，以「老地方·新感動」為主題嘅周年慶典，集合五大主題體驗區，包括「經典譚仔味區」、「破格滋味區」、「譚仔 x 恆香聯乘區」、「零售精品區」、「譚仔姐姐俄羅斯公仔打卡區」，畀大家盡情打卡兼擦餐飽，展期由今日起至7月1日！
自認係譚仔忠粉嘅Ali，表示由細食到大，仲試過一次過嗌6個餸添，真係唔好睇Ali骨杉杉咁，原來係勁擦得！佢仲公開埋每次必嗌items，想跟Ail「搵食」嘅不妨參考吓啦！唔知Ali又食開咩辣㗎呢？有「地獄廚神」之稱嘅Ali，依家嘅廚藝有冇昇華？撚手菜又係咩？
Ali透露電影《慾望寄生》已經殺科，諗返第一日開工就同袁詠儀、余香凝對戲，Ali話都有啲壓力㗎！之後想挑戰做啲反差大嘅角色，例如係打女、大胃王等，齋聽都覺得有料到！Ali又話另一樣想試嘅係舞台劇，日前去咗撐強尼嘅《大象的告別式2.0》，大讚老best不愧為「全尼」，跳舞、唱歌樣樣精！Ali稱如果有登台機會都可以再挑戰唱《小幸運》！
另外，Ali繼續都有Update《悠長假期》籌備進度，指暫時未收到圍讀時間，雖然只同Edan見過一次面，但就覺得對方好健談、係一個有想法嘅人！Edan出名鍾意整蠱人、影黑圖，女神Ali唔止唔驚中招，更即場向兒登下戰書，鬥影黑圖回饋fans，睇嚟有場腥風血雨嘅大戰即將展開，兒登要睇路啦！
