【Viu】古天樂為主演電影《尋秦記》四出宣傳，但再忙都不忘「寵粉」。闊別樂壇25年，佢最近推出首張個人精選專輯《天命最高 BACK TO THE PAST》，早前喺銅鑼灣搞千人簽名會，場面墟冚到好似小型頒獎禮。到咗農曆年期間，古仔再下一城，噚晚喺尖沙咀舉行「Koo's New Year Party 2026」粉絲新春聚會，氣氛High到爆！連古媽媽、葉子楣、羅蘭、吳麗珠、馮素波同埋佘詩曼媽媽等都出席湊熱鬧。
古仔一出場即大派心心，仲同古媽媽齊齊為醒獅點睛，台下粉絲瘋狂大叫「老公」示愛，古仔即刻發揮冷面笑匠本色，笑笑口打圓場：「佢話我好高。」呢晚聚會根本變咗迷你演唱會，古仔應粉絲要求大開金口，連唱《今期流行》、《天命最高》、《男朋友》同《像我這一種男人》四首經典金曲。唱到《今期流行》時一度唔記得歌詞，要攞手機睇「貓紙」，仲唱到擰晒頭，連佢自己都忍唔住笑！不過一入狀態即火力全開，叫粉絲上台跳舞齊做經典「拜神」動作！
唱《像我這一種男人》同《天命最高》時，古仔更索性落台同粉絲零距離接觸，逐一握手致謝。佢感性表示：「我好開心可以同大家見面，我亦都係每個人親手同佢哋握過一次手，我覺得比錢更緊要，因為我會記住你哋每一個人，新年快樂！」古太們聽到眼濕濕。被問到今年會唔會出新歌同開紅館騷，古仔笑住賣關子：「諗下啦！」
而81歲嘅馮素波亦即場清唱幾句《天命最高》，又派利是俾古仔並笑言：「雖然好細封，但恭賀你事業發展到最高！」古仔對波姐極之恭敬，連環攬攬兼鞠躬祝佢身體健康。兩人早年拍《神鵰俠侶》結緣，古仔當年已對前輩照顧有加，情誼延續近三十年，難怪被讚重情重義。
