【Viu】電影《尋秦記》今晚舉行慶功宴，是晚dresscode係紅色，個個都着到紅噹噹，兩位「失蹤人口」鄭雪兒、「三弟」劉嘉龍驚喜現身！席間古天樂報喜，先宣布香港、澳門票房超越8888萬之外，後加碼公布2月14日情人節會推加長版《尋秦記Plus+多元宇宙版》！
古生指希望加長版推出後，票房能破億！啱啱金像獎宣讀提名名單，古生各憑《尋秦記》、《私家偵探》，雙料入圍「最佳男主角」，佢話獲肯定好開心，唔知古生私心想憑邊套戲爭影帝？對《尋秦記》並有11項提名，古生話係意料之外嘅事，亦戥滕麗名入圍女配開心！
再講到古生會喺情人節推出大碟兼黑膠，佢仲預告當日會舉行簽名會添！唔知「兩位愛人」宣萱、雪兒會買幾多隻碟支持？古生下一步就係開演唱會？
獲女配提名嘅滕麗名話入圍當贏，因為呢單嘢係完全冇諗到！Sonija郭羨妮笑話有即刻幫阿滕睇有咩對手，仲話全力撐阿滕攞獎，勁有愛呀！之後仲爆加長版嘅內幕！
而洪天明都係啱啱先知爸爸洪金寶憑《尋秦記》入圍「最佳動作設計」，仲話遲吓帶齊一家人去睇加長版！佢又搞笑踢爆囝囝睇戲嗰陣笑問：「點解三叔同爸爸咁早死！」真係笑死！另外，笑提閃卡去到第三版，佢哋仲有冇抽？先睇足本訪問！
