【Viu】「我最喜愛的男歌手」古天樂趁今日情人節推出首張個人精選專輯《天命最高BACK TO THE PAST》，仲喺商場舉行簽名會，過500位「古太」逼爆4層樓，更有小fans打扮成「盤兒」，勁cute呀！「劉太」甘比亦化身小fans上台送禮兼率先攞簽名，贏咗99.9%香港人呀！
古生話知道有唔少古太通排攞籌，既擔心又心痛，原定只會簽200隻碟，會唔會加碼簽多啲回饋班古太？眾所周知古生嘅簽名係水蛇春咁長，笑問如果為加快簽名速度，會唔會設計返個縮短版簽名？古生霸氣秒回：「我係唔會縮短㗎！」勁man呀！唔知古生會唔會自己買返幾隻攞個Luck？
因為今次古生係唔會唱歌，咁佢下一步係咪會開演唱會，搵埋碟入面嘅合唱歌手做嘉賓？呢條橋又有冇得諗？古生更揚言會考慮出新歌，首選係快歌，咁會唔會跳舞先？定會好似黎明咁坐喺度唱快歌？
仲有幾日就係大年初一，古生話會放假陪屋企人，不過目前最急切嘅係大掃除！篤信風水命理嘅古生會再擺個新嘅風水陣？馬年咩色衫旺佢？而年宵就喺大前日開鑼，古生笑話見到有商家打扮成秦王，係差「項少龍」，會唔會搵日嚟個快閃？
《尋秦記》將喺泰國上映，成套戲都會配上泰文，古生話有興趣睇講泰文嘅自己，唔知古生又真係識唔識泰文？另外，旗下藝人周秀娜遭恒基兆業地產集團聯席董事局主席兼董事總經理李家誠入稟控告誹謗及騷擾，古生有冇關心對方？足本訪問新鮮滾熱辣送上！
