【Viu】ANSONBEAN噚晚同Cloud出席電台直播節目，首次跳唱《RISE》同新歌《OMG（on my grind）》，講到佢日前喺ig自爆確診，問到身體康復情況？佢話上星期去打拳都冇乜力，但經過密集式嘅運動warm up，身體總算開始適應，只係擔心跳唱，每日啪十粒維他命丸補身。ANSONBEAN又笑話中招後真係會有腦霧，仲曾經斷片，咁大件事？
提到由佢同Winka唱主題曲嘅電影《明日戰記》破本年華語片首日開畫冠軍，ANSONBEAN勁雀躍咁話諗緊包場請朋友、屋企人去睇，要多多支持咁話！問到Cloud有冇機會同ANSONBEAN合唱？佢就大賣關子，仲自薦可以跳唱添！
同場泳兒全程口罩上陣，原來身體有少少唔舒服，佢話開騷在即更注重身體健康，雖然暫時未閉得關住，但有向公司申請咗開騷前一定要有段時間休息，同時又講到經過上次嘅呼籲，身邊嘅朋友真係真金白銀買飛支持自己，令佢好感動！
