【Viu】ANSONBEAN、林愷鈴及葉巧琳等今日喺中環出席香港時裝設計師協會主辦嘅「Juxtaposed 2022 FASHION META」活動。早前啱啱出咗新歌《RISE》嘅ANSONBEAN，因為拍MV嗰陣用咗好多唔同兵器，依家打交打上癮：「好好玩，尤其條九節鞭，我成日打到自己個頭。」林愷鈴話自己喺由七大導拍攝、全菲林電影《七人樂隊》入面，都有唔少動作，但就自嘲手腳唔協調。
ANSONBEAN嚟緊會同Kayan9896吳家忻喺Viu嘅新劇合作，佢將會獻出自己嘅第一次，但依然要賣關子，叫大家到時留意劇情。ANSONBEAN喺劇入面飾演細心男朋友，佢搞笑話：「我平時好唔細心，成日唔記得帶嘢，去沙灘冇帶遮嗰啲。（女友會唔會嬲？）唔緊要，最緊要用個正面嘅心態。」林愷鈴就忍住笑話：「如果係我，因為佢呢個正面，OK，我唔會嬲。」
