【Viu】「澱粉之父」張敬軒今日出活動獲4歲小fans「進貢」麵包，其間又不停大叫「軒爸爸」，冧到皇上即刻上前接禮，點知小朋友怕醜，送完禮物就向後企，場面爆笑！同時「下世未婚妻」突擊踩場，二話不說嚟個深情擁抱，呢句「師傅愛你」真係好肉緊呀！唔怪得軒公抵死笑話呢一抱feel到師傅三圍數字！ 軒公喺完紅館騷後休息咗一日就繼續開工，嚟緊仲接咗套笑片做男一，佢透露9月就開工，睇完劇本覺得好正，可以向「動作巨星」方向進發：「動作特別多，但冇話係打鬥。（愛情動作？）有就固之然好啦！都好dry！」 同場Elva倪晨曦佗B 5個幾月，預產期喺11月，問到BB性別？佢笑話連佢自己都唔知，有計劃今胎搞baby shower開心吓，又笑話呢次應該都會同上一胎一樣開工到last minute。問到有冇害喜情況？Elva指之前好唔舒服，成日頭暈又冇乜力，依家就好好多，日日都灌輸囝囝Virgil就快做哥哥。
