【Viu】張敬軒嘅26場紅館騷噚晚去到尾場，仲要係佢人生中第50場紅館騷，佢都賣大包請嚟3位嘉賓，第一位係多年老友Ivana王菀之，佢仲寫咗封「洋蔥」信，搞到軒公喊晒口。第二三位嘉賓，分別係MIRROR嘅Ian同Jer，Ian送咗部古董玩具車俾軒公，而阿Jer就自肥攞碟上台拎簽名。噚晚尾場，軒公更5度encore，唱到凌晨一點幾，佢自己都話未計尾場，罰款已過百萬，不過fans嘅支持係最重要嘅，軒公真係好寵粉呀！問到邊位嘉賓最深刻，佢就揀同佢經歷咗好多嘅Ivana啦，軒公仲自爆試過俾社團人士困房仔添呀，而Ian送嘅古董車佢一樣咁鍾意，話係彌補佢嘅童年缺失呀！
