【Viu】洪嘉豪(Kaho)最近推出雙碟專輯《Learning Curve》，其中一隻碟所收錄嘅5首作品，都係由Kaho一手包辦曲、詞、編、監兼混音㗎！呢5首歌能夠面世，Kaho話要多謝張敬軒，事關佢有份作曲嘅歌，都係用當初軒公送俾佢嘅音樂器材去創作嘅，佢仲話喺音樂路上，軒公真係俾咗好多鼓勵自己，係佢嘅啟蒙老師，亦希望有一日可以同對方合作，但就唔會強求，認為時機到總會有機會合作喎，認真佛系。
另外，Kaho預告今年有機會舉辦個人演唱會，不過詳情仲未落實，叫大家密切留意！佢仲自爆嚟緊會有4首新歌排住隊等出街，首首都係自信之作，包大家滿意咁話啊！係咪好期待呢？
