【Viu】早前有傳姜濤會喺5月14日做嘉賓，有黃牛黨乘機高價兜售該場次，事後姜濤同軒公齊齊出
post否認，但點知呢個美麗嘅誤會促成真邀請，今次真係多得班黃牛喇！軒公仲分享佢同姜濤嘅相識經過，佢哋四年前喺公開活動上認識，再成為網友，大家私下話題總係離唔開唱歌同音樂，呢份上進心令軒公不知幾咁感動，故揚言：「我買你贏！」再直說：「我諗應該你離自己嘅個人演唱會都唔遠啦！」呢番說話仲勁過打強心針呀！
而上得軒公紅館舞台做嘉賓，又點少得送禮呢？今次姜濤好有心思咁準備自己最鍾意、食得落肚嘅禮物，就係由佢代言快餐店嘅薯條同漢堡包，軒公見到終於唔係紙製禮物即刻心心眼，就喺呢個時候姜濤伸手餵軒公食薯條，之後仲自肥偷食，成個得戚樣出晒嚟！雖然軒公事後睇相，話個餵食畫面有啲似做緊PCR，不過都沾沾表示呢個福利得佢先有㗎咋！最後姜濤以演繹重新編舞嘅《Master Class》作結，誠意十足！相信喺台下睇騷嘅「奶奶」姜媽媽都應該好proud of my son！
