【Viu】張敬軒喺噚晚播出嘅ViuTV節目《爆谷一周》接受主持谷德昭訪問，真係不設防有問必答，佢重提同牆紙大王陳鼎禮上契後一齊打造錄音室，有傳佢哋因為蝕錢而吵大鑊，軒仔講返都話自己當年太年少氣盛，一直以嚟佢都有個終極目標就係如果有一天佢要退隱樂壇，佢一定會留喺錄音室做返佢嘅老本行，而當時真係太心急，覺得追夢要趁早，難得有個契機可以開設錄音室，佢就將自己15年合約投資落去，仲話如果當時嘅自己，有而家嘅智慧同社會閱歷，件事就唔會有咁差嘅結果，會處理得更好！而被男fans問到感情事，軒仔都好似食咗誠實豆沙包咁如實作答，佢直認自己唔係一個理想情人，仲話自己好傳統，每次有戀愛嘅機會都希望係廝守終生，所有生活上嘅喜好、情調、情趣等，都建立喺兩個人嘅靈魂交流上，令到身邊人都話佢對感情要求比較高啊！
