【Viu】大馬女神林明禎今日出席小市集活動，吸引半百fans到場支持。聽日係明禎BB 32歲生日，大會同Fans都有專程預備蛋糕，全場圍觀者一齊唱生日歌俾明禎BB聽，好sweet呀！今年明禎BB身在香港，而媽咪、家姐就喺大馬，三人分隔兩地，女神都呻可惜，佢話希望今年願望可以三母女一齊去旅行，問BB想去邊？佢即搞笑話：「梗係唔可以話俾你哋聽！」明禎BB啲半鹹淡廣東話真係cute死人。
近月暫居香港做嘢嘅明禎bb，已經拍咗幾個廣告，似乎都賺夠錢買樓啩？但佢就謙虛話：「距離目標已經好近喇！」早排擔任張敬軒演唱會嘉賓，喺台上同軒公合唱情歌被一致讚好，問明禎BB想唔想做歌手？佢話：「都有學緊唱歌，希望今年有自己嘅作品。」問佢想唔想邀請軒公拍MV？BB話唔想打擾軒公喎！又靚又善解人意得唔得㗎！
