【Viu】張敬軒出道20周年演唱會，受疫情影響中途暫停4個月，噚晚終於重啟，為之前受影響嘅觀眾再連唱十六場！軒公仲晚晚都會當尾場咁唱，所以噚晚就打孖上有兩位嘉賓，最令人意想不到嘅，梗係著住一身仙氣魚尾裙嘅大馬女神林明禎喇！女神除咗人到，仲帶埋大馬特產貓山王榴槤俾軒公補身，話俾佢做早餐啊！而另一位嘉賓就係同軒公相識多年，Friend到幾乎想一齊組男團嘅陳柏宇，佢哋一齊合唱《斷點》真係正到聽出耳油啊！重啟頭場就有咁正既嘉賓，搞到歌迷們都好期待之後場次，軒公請到邊啲老友嚟助陣，網上仲流出咗疑似嘉賓名單話有兩位MIRROR成員，仲有人開Post話其中一位係姜濤，然後公開飛放！搞到軒公都要親自出馬留言辟謠，姜濤都喺IG Story話係流料，希望大家小心為上呀！
