【A&M Diary】食韓燒又點可以無韓牛呢？想嘆抵食高質嘅韓牛除咗去韓國首爾馬場洞之外，原來沙田都有馬場洞烤肉專門店！馬場洞烤肉專門店嘅韓牛質素有保證，加上餐廳地方寬躺，枱與枱之間有一定距離，所以坐得舒服，環境唔錯。
泡菜
食韓國菜又點少得泡菜呢！一落完order，店員就送上泡菜，泡菜非常惹味開胃，重點係可以無限refill，啱晒鍾意食泡菜嘅我哋！
韓牛西冷
今日我哋就揀咗1++級嘅韓牛西冷，韓牛份量十足，有成180g！韓牛油脂分佈平均，大概燒到7成熟就啱啱好，肉質軟腍，肉味香濃，非常juicy！想增加味道嘅層次，可以點上醬汁，我哋就特別鍾意Woomtree Wasabi，因為可以中和油脂感，更加惹味！伴碟仲有香菇同鳳梨片，燒過嘅鳳梨片，又香又酸又甜，好好味。
伊比利亞豬肩肉
除咗韓牛，呢度嘅伊比利亞豬肩肉都唔錯，份量都有成150g架！燒豬肉個時間一定要控制得好好，如果唔係就會好乾好靭，好彩店員會幫手，令到呢個伊比利亞豬肩肉以最佳面貌見人，燒到外脆內嫩，完全無浪費隻豬！
海鮮嫩豆腐鍋
食完咁多肉，係時候飲返個熱湯暖胃啦！呢個海鮮嫩豆腐湯嘅海鮮同樣足料，有蝦、青口同大蜆，湯底可以揀辣或者唔辣，今次我哋揀咗唔辣，可以飲到海鮮湯嘅鮮甜！
