【A&M Diary】太耐無得去泡菜國吃喝玩樂，最掛住除咗韓國嘅奧巴，當然仲有我最愛嘅韓國菜啦，所以今日決定同M佬去嘆吓韓國菜！一講到韓國菜，一定諗起韓燒同炸雞，但其實仲有好多地道嘅韓式食品，想一次過食勻唔同種類，喺尖沙咀嘅K11 Art Mall就有一個類似foodcourt形式嘅餐廳：The JANG – Pocha & Korean Cuisine，絕對可以一次過滿足幾個願望！
The JANG其實集合五個品牌，包括主打韓式中華料理嘅恭合春、食炸雞嘅NeNe Chicken、主打韓國粥品嘅Juk Story、食韓燒嘅Modern Majang BBQ同路邊檔嘅布帳馬車菜式Jang Pocha。另外，餐廳嘅佈置非常用心，啱晒大家打卡！牆身除咗有吸睛嘅霓虹燈之外，仲用咗圓拱形嘅設計，感覺好似韓國嘅汗蒸房，trendy嘅裝修加上地方闊落，完全超乎你對Foodcourt嘅概念。
前菜
一坐低店員就送上前菜，今日款式係泡菜同涼拌青瓜。每一小碟都非常惹味又開胃，泡菜非常辛辣入味，而我哋最欣賞係個涼拌青瓜，用爽甜嚟形容一啲都唔過份！
炸醬麵
主打韓式中國料理嘅恭合春，係韓國公認嘅炸醬麵始創店，所以嚟到當然唔少得食番碗炸醬麵啦！大大碗嘅炸醬麵上面鋪滿勁多炸醬，而炸醬呈現深啡色，睇見都覺得非常入味！炸醬入面除咗豬肉，仲有蔬菜、洋蔥、薯仔等等，每條麵條都非常掛汁，整體嚟講份量偏大，非常滿足。
莞島鮑魚粥
以前去韓國旅行，早餐都會食碗韓國粥。不過，喺香港好少見到韓國粥，嚟到The Jeng就有主打韓國粥品嘅Juk Story，所以二話不說就叫咗個莞島鮑魚粥。韓國粥類似潮州粥同Risotto嘅混合，白粥煮到軟腍但又粒粒分明，加上鮑魚係嚟自全羅南道莞道水域，非常鮮甜！
