【A&M Diary】以前我哋好鍾意星期五放工就拎埋個篋去旅行，呢個係青春嘅回憶呀！喺韓國嘅街頭，仲有唔少大排檔，絕對係夜媽媽嘅宵夜推介。雖然好耐無去過韓國，但原來呢種地道風味已經殺入尖沙咀，呢間位於厚福街嘅hoo韓國包車，除咗有韓式地道嘢食之外，餐廳仲設計成韓國街頭風，打卡都一流架！
辣辣無骨雞腳
晚餐就由一碟中辣嘅辣辣無骨雞腳開始，雞腳爽脆又無骨，食嘅時候夠晒方便。雞腳嘅份量好多，加上辣度好有層次，非常開胃惹味。
招牌炒章魚
呢個招牌炒魷魚係餐廳嘅招牌菜，唔算太辣，同樣非常惹味。特別欣賞佢哋嘅魷魚，全部大大粒，煙靭又彈牙，好有口感。除咗章魚，生菜索晒醬汁嘅精華，好好味！
街頭魚糕串串
鍋連爐一齊上，食住魚糕再飲熱辣辣嘅湯真係好有韓國嘅感覺呀！魚糕串有5串，起初仲覺得要同M佬爭食，但原來鍋入邊仲有幾件小魚糕同蘿蔔，材料都幾豐富，魚糕索晒味道清甜嘅湯底，係必叫之選。
甜辣炸雞
炸雞有分唔同size，呢個M size就有5件雞，啱晒2至3個人食！雞件即叫即炸，上枱嘅時候夠晒熱辣辣，值得一讚係唔會太厚粉，雞皮脆卜卜而雞肉夠juicy。另外，雞嘅外層佈滿甜辣醬汁，真係好yummy！
