【A&M Diary】12月就梗係要對自己好啲啦，除咗放題同自助餐之外，和牛同韓牛又會唔會係你嘅選擇呢？今日嚟到將軍澳新都城，食主打韓國菜嘅小店韓閣。餐廳近期推出多款精選美食，以迎接年尾同年初嘅假期。其中性價比高而大受歡迎嘅頂級韓牛1++燒肉套餐，想食就記住提早預約喇。
北海道帶子蟹子沙律
前菜有呢個北海道帶子蟹子沙律，帶子都有成4、5粒，鮮甜爽口。蟹子十足，鋪滿沙律菜上，而沙律菜非常新鮮，清爽開胃。
火辣辣鳳爪
食完個清新嘅前菜之後，另一款前菜就相對刺激！呢個鳳爪勁多韓式辣醬，緊辣，但又非常入味，鍾意食辣嘅人一定覺得好惹味。
烤蟹膏軟殼蟹手卷
呢個卷物嘅味道非常有層次！面頭鋪滿蟹膏，入面就係啱啱炸起嘅軟殼蟹，非常香脆，配埋佢哋特設嘅醬汁，味道好豐富，好驚喜。
韓閣雜錦小食拼盤
呢個小食拼盤除咗沙律菜，仲有釀雞翼同青口，我哋就特別鍾意釀雞翼喇！雞翼燒到好香脆，而入面有啲芝士同菇，味道帶有雞油香味，好creamy。
牛骨魚膏片湯
以前去韓國旅行，就好鍾意喺街邊食魚糕片。魚糕片嘅份量好多，配上清香嘅牛骨湯，真係好match好暖胃。
