【A&M Diary】香港有唔少泰國餐廳，但講到精緻又有質素，位於銅鑼灣The L .Square嘅Chang Thai Restaurant & Bar就係我哋近期嘅心水推介！一入到嚟Chang Thai Restaurant & Bar就已經覺得環境好舒服，餐廳透光度高，非常開陽！而且餐廳裝修幾型格，坐位闊落，非常舒適！重點當然係食物高質，除咗好味仲可以打卡添呀！
四式小食拼盤
呢個四式小食拼盤絕對係打卡嘅必叫選擇呀！呢個拼盤以飛天鞦韆為造型，而且用上金色，充滿泰國色彩。除咗外觀之外，拼盤有四款小食，分別係：泰式生蝦、泰式鳳爪、青木瓜沙律同糯米丸串，每款兩碟，夠晒兩個人食！特別鍾意泰式生蝦，入面已預先加入秘製醬汁，好滋味呀，而且生蝦每日空運直送，所以夠晒新鮮；另外，泰式鳳爪酸酸味味，非常醒胃，鳳爪彈牙好入味！另一驚喜嘅就係糯米丸串，一咬落去，肉汁就會爆出，好juicy呀！
串燒雙拼
呢個串燒有雞肉同豬肉各兩串，份量啱啱好，而且擺盤非常精美！食串燒嘅重點當然係沙嗲汁啦，Chang Thai Restaurant & Bar嘅沙嗲汁非常香濃，仲有好香嘅花生醬香味，令串燒更加惹味。
冬蔭公海鮮湯
不得了，呢個冬蔭公海鮮湯真係超級好味呀！冬蔭公海鮮湯以每人一盅上枱，夠晒熱辣辣之餘，份量仲十足架！配料有大蝦、青口、帶子、蘑菇、草菇同唔同香料，所以味道除咗酸酸辣辣，仲帶有海鮮嘅鮮甜味，好有層次！
泰式燒美國PRIME肉眼扒
當泰式調味遇上美國PRIME肉眼扒，就係好好味囉！燒過嘅美國PRIME肉眼扒，除咗帶有一點焦香感，重點係燒嘅過程將肉嘅油份迫出，食嘅時候唔會有太油膩嘅感覺，加上燒肉嘅生熟程度啱啱好，食嘅時候一啲都唔靭，而且肉汁非常juicy！
黃咖哩軟殼蟹配農夫包
餐廳肯定呢個係二人餐？Chang Thai Restaurant & Bar嘅二人套餐份量真係唔會偷工減料！呢個黃咖哩好香，椰香十足，如果撈飯，相信我真係可以食兩碗呀！軟殼蟹炸得香口，仲有好多蟹膏，甘甜鮮美，香濃而不鹹。最後農夫包雖然索晒黃咖哩汁，但份量真係好多，我哋食咗少少就宣布投降喇！
香蕉糭、西米糕
香蕉糭用蕉葉包好，所以除咗香蕉嘅甜香味，仲有蕉葉嘅層次！香蕉糭入面仲加入咗唔少豆，所以甜度唔會太強，好啱香港人食！至於西米糕嘅椰香十足，入面仲加有粟米同芋頭，增加口感！
