【A&M Diary】當韓式燒烤遇上熟成牛肉，會有咩效果呢？就係好好味呀！今日M佬帶我去食好嘢，嚟到位於灣仔嘅貊炙，貊炙主打香港少見嘅韓式熟成牛肉燒烤，加上自設熟成櫃，性價比非常高！餐廳另外設有3間獨立嘅VIP房，如果有慶祝活動或傾吓生意，都非常適合架！
熟成牛肉
貊炙嘅門口就有一大個熟成牛肉櫃，裡面放滿熟成牛肉，望見已經覺得非常吸引！其實熟成牛肉要先經過28-45日風乾，將入面嘅水份蒸發，咁食到嘅牛肉就更加濃香juicy，而且味道都會係獨一無二！我哋今日就叫咗House Dry Age Steak嘅二人餐。
前菜上半場
一坐低之後，店員就會奉上韓式前菜，所謂上半場係因為之後真係會有下半場架！韓式前菜上半場有醃蘿蔔、大豆芽同魚仔，夠晒開胃！
熟成麻油拌生牛肉
食食吓前菜，餐廳就奉上熟成麻油拌生牛肉。大家要留意，貊炙嘅上菜係有次序嘅，食完一樣再上一樣，令味覺慢慢踏上旅程。呢碟生牛肉嘅麻油味好香，牛肉滑身，肉味香濃，肉質軟腍，好好味！
泡菜海鮮醃漬卷
呢個泡菜海鮮醃漬卷超級好味呀！一大個泡菜睇落平平無奇，當店員剪開之後，泡菜就會散開，入面包住五花腩肉、帶子同蝦仁等等，食嘅時候好有層次，但更大賣點係泡菜嘅酸辣度啱啱好，好惹味！
韓式燒鰻魚
呢款韓式燒鰻魚係二人餐以外嘅食物，店員會好細心幫我哋燒，燒到焦香之後，再茶上醬汁。燒完之後，鰻魚非常入味，而且完全無骨，味道除咗帶有焦香味，醬汁濃郁，仲帶有少少甜味。
生菜包及包飯醬
燒烤開始前，店員會送上生菜包，裡面有生菜、紫蘇葉、青瓜條、甘筍條、車厘茄同青椒等等，非常新鮮。
牛肉拼盤
二人餐嘅牛肉拼盤有四款肉類，店員非常細心介紹，仲提議我哋食物嘅先後次序。如果你想食到最好嘅燒肉時間控制，可以煩請店員幫幫手。
和牛橫膈膜肉：第一款食嘅肉就係和牛橫膈膜肉，勁多肉汁，呢個部位嘅肉質細嫩但又有嚼勁
和牛牛舌：牛舌有厚切同薄切兩款，我就鍾意厚切多啲，燒完之後，非常爽口
熟成肉眼：重點當然係熟成肉眼，口感軟腍，牛扒網紋煎得幾靚，油香十足，非常juicy，仲帶有焦香味道
熟成醬油牛肋肉：醬汁味道偏甜，牛肉勁入味，屬於重口味嘅選擇
前菜下半場
食完肉之後，店員就會上前菜嘅下半場，有水泡菜、生魷魚、大白菜泡菜，可以食啲泡菜清新一吓，再迎接最尾嘅飯類選擇。
