【A&M Diary】自從同M佬一齊住之後，對方已經清楚知道自己最真實最赤裸嘅一面，有時落街，隨意到連頭髮都唔梳，妝都唔化。久而久之，好想重拾拍拖嘅感覺，所以決定book間靚靚餐廳，為對方悉心打扮一吓！今日嚟到位於油麻地嘅Bellevue Bar and Grill，餐廳位於高層，可以飽覽油尖旺，遠至大角咀一帶嘅海景景色，靚景配美食，有得打卡之餘，仲啱晒大家嚟呢度慶祝周年紀念啦！
麵包
落完order就送上餐前麵包，麵包焗到好香脆，特別鍾意粟米包，入邊真係有粒粒粟米，麵包充滿住粟米嘅香甜味。
香煎蟹餅伴青檸珍珠
蟹餅煎到非常脆口，香口嘅外皮入面就有絲絲嘅蟹肉，滿足感爆分！蟹餅厚實，肉質鮮甜，配上青檸珍珠，令蟹餅更清新。旁邊仲有黑醋汁沙律，絕對係一個唔錯嘅開胃菜。
香煎北海道帶子半什菌忌廉汁
兩大粒帶子，煎到半生熟，外表微燶脆口，而入邊軟腍，口感一流。我就鍾意成粒擺入口，感受滿滿嘅幸福感；而M佬就鍾意切開嚟食，將美味時間現場。
龍蝦濃湯伴海鮮雲吞
食完前菜，就上濃湯喇！海鮮雲呑同湯分開上，咁樣可以保存湯料嘅口感。龍蝦湯超濃郁，入口柔滑舞渣。至於炸過嘅海鮮雲吞脆卜卜，餡料勁多蝦肉，好彈牙。
鮮蠔濃湯
請問用咗幾多隻蠔去打呢個濃湯？湯底蠔味濃郁，非常鮮甜，原隻嘅鮮蠔飽滿，夠晒滿足。
烤銀鱈魚扒
鱈魚扒厚身，魚肉嫩滑，油脂豐富，口感豐腴！魚皮超脆口，烤嘅時間啱啱好！我哋就略嫌醬汁較淡，適合淡口味朋友。伴碟有薯蓉同蔬菜，特別一讚個薯蓉超creamy！
燒美國安格斯熟成西冷扒
我哋比較少食熟成牛扒，所以今次某程度都係為咗熟成牛扒而嚟！餐廳自設乾式熟成牛扒櫃，所以非常衛生，牛扒質素更有保證，食得更放心！店員建議熟成牛扒最好嘅烹調時間係三成熟，因為經過乾式熟成嘅牛扒，食嘅時候唔會好似平時啲牛扒血淋淋，而且亦係最軟腍嘅肉質。我哋就揀咗肉味較濃嘅西冷，牛扒網紋煎得幾靚，油香十足，仲帶有焦香味道。整體嚟講，肉質幼嫩，肉味濃郁，好juicy！
焗菠菜忌廉千層薯
薯仔切到薄片，再一層一層疊起烤焗，所以呢個千層薯真係好考廚師功夫。至於食嘅時候，口感真係好有層次感。至於味道除咗菠菜味，仲有豐富嘅芝士忌廉味，芝士焗到焦香，整體嚟講好creamy呀！
