【A&M Diary】今個weekend我同A姐去咗位於灣仔嘅香港萬麗海景酒店（Renaissance Hong Kong Harbour View Hotel）玩番2日1夜，重拾去旅行嘅歡樂時光。而除咗入住體驗之外，呢個「住宿+餐飲」Staycation package仲包埋喺酒店內嘅Mirage Bar & Restaurant食晚餐同自助早餐，有得食又有得玩，好抵呀！
晚餐
因應疫情嘅人數管制，所以餐廳將當日嘅住客，分為2個用餐時段，我哋就獲安排17:45用餐，雖然時間就早咗少少，但好在可以喺餐廳欣賞日落，夜晚又可以喺附近買啲宵夜食吓。
周打蜆湯 Clam Chowder
呢個湯好creamy呀！入面勁多料，啲蜆肉脹卜卜，好甜㗎！湯加上脆煙肉，令飲湯都有唔錯嘅口感！牛油味超香濃嘅多士，好滿足呀！
香烤比目魚柳 Roasted Halibut
A姐就揀咗香烤比目魚柳，伴菜有白豆、西班牙辣肉腸、蕃茄同法式海鮮湯。魚柳超滑，配上法式海鮮湯原本超夾，湯底鮮甜濃郁，淡淡香濃海鮮味！
草飼西冷牛扒 Grass Fed Sirloin Steak
食西餐又點少得牛扒呢？今次叫咗草飼西冷牛扒，我哋叫咗3成熟，但我哋目測佢似5成熟，不過牛扒勝在軟腍，而且牛味香濃。唯一美中不足就係伴菜較少。
菠蘿芝士撻 Pineapple Cheese Tart
呢個係超好味呀，從來無諗過芝士同菠蘿係咁夾，如果可以嘅話，我想encore多半打。
紅酒或白酒一支
嗰套餐仲包一支餐酒，有白有紅，我哋揀咗白酒，容易入口，好清新！
早餐
自助早餐時段由朝早7點至10點半，琴日check in時，職員都提醒我哋9點半後人流較多，可能需要等待一段時間先可以用餐。最後，我哋9點入場，而9點半真係有唔少人排隊呢！由於疫情嘅關係，除咗少部份嘅食物喺bar檯自由領取，其他熱食都係落單，再由侍應生送上。
