【A&M Diary】食米線真係會上癮㗎，但當同一間米線食得多，有時都會想轉吓場，刺激一吓味蕾。近日，我哋得到旺角在地人米線推介，嚟到位於勝利道嘅占占酸辣米線，呢度酸辣嘅比例啱啱好，加上店舖新開張，所以店主好有誠意，仲詢問我哋食後感，希望繼續用心經營！
沙嗲屋村三寶
呢間米線餐廳無常見嘅土匪雞翼，反而就有呢個經典港式小食：沙嗲屋村三寶！三寶分別係豬皮、牛柏葉、魷魚，特別一讚沙嗲味超濃，仲有粒粒花生，味道好有層次！至於豬皮同牛柏葉勁索汁，好入味！
炸墨魚春卷
即叫即炸，外皮炸到脆卜卜，春卷入面有勁多墨魚粒粒，好有口感。如果有埋泰式辣醬就更惹味喇！
雞絲、腩肉、腐竹酸辣米線（中辣）
呢度嘅餸有成30款選擇，真係花多眼亂呀！我就叫咗酸辣湯底，上枱就梗係要飲啖湯先啦，入口先嚟一陣酸味，而辣味緊隨，酸同辣嘅比例啱啱好，好有驚喜，更重要係湯好夠熱！至於餸同米線嘅份量好多，雞絲嫩滑、腩肉肥瘦適中、至於腐竹勁索湯，絕對係必叫項目。
魚腐、雞翼、蘿蔔麻辣米線（中辣）
M佬唔食酸，所以就叫咗麻辣，同樣上枱就要先飲啖湯啦！聞上去好香麻味，相信用咗好多香料製成，麻味好有層次，一開始食嘅時候覺得唔算太辣，但後勁凌厲，越食越辣，夠晒刺激！魚腐夠爽口、雞翼滷水味香、蘿蔔鮮甜無渣。
