【A&M Diary】近期將軍澳有一個魔雪奇緣展覽，吸引一班小朋友，當然唔少得A姐……個契女啦！行完展覽，我哋就去到將軍澳新都城嘅亞金南洋茶室食星馬菜，選擇都唔少，有叻沙、海南雞、肉骨茶等星馬菜必食嘅菜式，估唔到價錢抵之餘，仲勁有驚喜喎！呢度嘅晚餐夠晒抵，除咗主菜之外，仲有油菜同飲品，仲可以以優惠價錢加購小食，份量非常之多，CP值高。
炸蝦餅
炸蝦餅相信用咗勁多蝦製成，所以蝦餅彈牙，而且即叫即炸，炸到金黃色，外觀非常吸引又夠香脆。
招牌叻沙
呢度嘅叻沙湯底確實滿分，充滿濃郁嘅椰香味，非常順滑。我哋揀咗中辣，食得出用咗唔少香料，令味道非常有層次。配料有魚腐、鮮蝦、蟹柳、魚片頭、魷魚圈、豆卜等，份量非常之多，連蝦都有兩隻。麵底就揀咗滲滲，即油麵加米粉，增加口感。
一字骨肉骨茶配白飯及油條
呢度嘅肉骨茶係馬來西亞派別，湯底充滿濃郁嘅藥材味，係我哋最鍾意㗎 ！一字骨有成六舊，份量又係比預期多，仲要成個砂煲上，飲到底仲夠熱辣辣。
白玉仙草
甜品方面，我哋就揀咗白玉仙草，入面有涼粉、龍眼肉同椰果， Q彈嘅椰果同軟腍腍嘅涼粉形成強烈對比，非常有口感。至於龍眼肉清新鮮甜，好滿足呀！
