【A&M Diary】我未識M佬之前，好少食海鮮，因為我嫌食海鮮麻煩，又驚俾人呃，但自從識咗勁鍾意食海鮮嘅佢之後，我哋周不時都會去食海鮮，佢仲會幫我起殼去骨，等我食到啖啖肉，你話佢係咪好sweet呢？雖然好多人覺得食海鮮係貴價嘢，但我哋今次就嚟到主打食蟹、龍蝦同小菜嘅尖沙咀翠林辣蟹舫，近期仲有唔少優惠，海鮮夠晒新鮮，煮法又有創意。
黃金流沙龍蝦
龍蝦唔一定係上湯同芝士焗嘅，大廚玩另類，將近年好興嘅鹹蛋黃金碎加入龍蝦，估唔到又幾好味喎！炸到香口，龍蝦索晒濃郁嘅鹹蛋香味，加上預先切件，勁容易食到啖啖肉。
避風塘香辣蟹
蟹勁大隻，又多肉，用避風塘方式炒，夠晒惹味。蟹嘅外面焦脆，蒜香味濃，微辣，味道好有層次。
濃湯大花膠雞
嘩！花膠大到嚇死人呀！聽店員講呢個湯煲左超過六個鐘，大大塊嘅花膠真係超足料，飲落膠口，骨膠原十分豐富！另外，湯裏面嘅雞肉竟然非常嫩滑，真係湯渣都食埋。
