【now.com生活】相信唔少女仔都經歷過「瀏海太長但又唔想為咗一撮仔頭髮走去Salon」嘅經驗，好貴嫁嘛！Now生活教室今次搵嚟髮型師Ivan教我哋一分鐘剪瀏海，咁就自己喺屋企都剪到啦！
剪頭髮之前緊係要洗濕個頭先，然後就將頭髮中間分界，跟住就要搵瀏海嘅三角區域，由中間點喺左右兩邊分界拉出頭髮。Ivan補充如果想瀏海薄啲就要搵較前嘅中心點拉小三角，想厚啲就用較後嘅位置拉大三角。
接住落黎 ，就要搵個髮夾幫助定位集中瀏海，記得要將髮夾背向外，夾喺落剪位置上少少唔使太高，夾完後將瀏海扭一下，剪出嚟嘅瀏海就會有孤度。
一切準備就緒就可以水平一刀剪落去，就大功告成喇。剪完嘅瀏海除咗有齊陰效果，仲可以根據原有髮界做到斜陰，真係好方便㗎！
特別鳴謝：Ivan Kwok
場地鳴謝：Aim Hair Studio
