【now.com生活】由朝到晚坐Office，放工又懶得做運動，搞到下身愈來愈肥，上年啲牛仔褲都唔啱着。Now生活教室今集繼續有星級導師黃詠詩（Czon）教我哋3招擊退下半身肥胖。
第一個動作， 雙腳打開半蹲，膝頭同埋臀部成水平，腳趾膝頭指向同一方向，打橫行三至四步，維持姿勢十至十五秒，再打橫行返原位，重覆動作。先做5個來回，熟習後可增至10個來回，完成動作後先企直。
第二個動作， 雙腳合埋，提起右腳，左腳企直，保持腹部收緊，之後右腳向後提高。呢個動作除咗臀部同埋雙腳，腳踝都會出力，特別適合成日着高踭鞋嘅女士。
第三個動作需要一張墊，先跪喺墊上，雙腳打開至盆頭距離，逐隻腳踏前深蹲再跪低，腹部收緊背脊挺直，想增加難度嘅話，可於深蹲時跳前跳後再跪低。每次可做10個來回或1分鐘。
每日只需要5分鐘，今個冬天着長褲就唔使驚「卡」喺中間啦，記住要持之以恆先見到成效㗎！
