【Viu】第44屆香港電影金像獎頒獎禮圓滿結束，現年68歲梁家輝憑《捕風追影》五度封金像獎影帝，36歲Fish廖子妤憑《像我這樣的愛情》一擊即中封影后，家輝哥仲主動拖Fish手仔合照，又話個獎好重，笑爆全場！家輝哥自責喺台上漏咗多謝電影宣傳同事，事關自己冇諗過得獎。講到佢喺台上感觸落淚，家輝哥就搞Gag話：「做畀我老婆睇㗎！」喂呀！再問到有冇咩角色想挑戰呢？佢就話：「作為一個演員，做到呢個年紀，希望自己嘅表現能夠令廣大觀眾有驚喜！」
至於出爐影后Fish一嚟到後台就問：「我係咪好失禮？」佢又話上台前已經食咗少少藥鎮靜情緒，估唔到都係一片空白，仲喺後台拎出「貓紙」補返多謝拍檔陳家樂同劉雅麗。笑指佢連男友小野都差啲漏咗，Fish爆笑話：「我個腦壞咗呀！」其後Fish再收拾心情多謝香港人接納佢嚟拍戲，希望自己可以打破「金像魔咒」，唔使三年冇戲拍喎，祝福祝福！快啲睇足本訪問啦！
