【Viu】「第三十二屆香港電影評論學會大獎頒獎典禮」今日舉行，搵嚟上屆「最佳男演員」兼五屆紀錄保持者劉青雲擔任頒獎嘉賓，先上台幽默發言，以得獎感言作開場白，真係畀佢笑死！佢又自嘲好「爛撈」，隊到埋嚟咩都拍，其中之一嘅拍攝準則係多女，想做新一代歡哥？
古天樂憑《私家偵探》攞「最佳男演員」，坦言冇諗過會有呢個成績，而憑《像我這樣的愛情》奪「最佳女演員」嘅Fish廖子妤就話講致謝詞嗰陣死忍住唔可以喊，又提到佢自爆細個睇香港電影大，當中包括三級片，唔知有冇睇過古老闆嘅三級作品《豪情》？
Fish搞笑話細個睇《絕世好Bra》學戴Bra、《嚦咕嚦咕新年財》學打麻雀，睇嚟古生係佢嘅人生導師喎！之後Fish話下一步想學開槍，古生有興趣搵埋青雲拍《絕世好Gun》？點知古生透露真係有計劃開拍呢個「絕世」系列，就連戲名都諗埋添！堅係好期待喎！
至於導演陳德森噚日爆料話監製新動作片，為香港動作特技演員公會籌款，搵嚟古天樂、張家輝、佘詩曼、吳彥祖主演，古生確認新戲應喺下半年開拍！
而古生喺農曆新年都參加唔少新春party，佢指依家好多人都夠膽叫佢唱歌，但就唔包跳舞嘅！早前佢同宣萱呢對CP開Live勁受歡迎，原來開Live呢件事係古生睇threads見到fans request㗎，真係超寵粉！下一件順應fans意嘅事又係咩？另外，甘草演員游颷上月尾因腦出血病逝，古生指曾跟對方合作過，收到噩耗一刻都覺得好突然。
