【Viu】Eason陳奕迅今日喺澳門舉行新專輯《CHIN UP！》 及續約環球唱片發布會，邀請亞洲各地傳媒及近千歌迷出席！Eason形容同環球唱片合作19年係一段難忘嘅旅程，而新碟收錄8首歌，全由林家謙作曲，編曲部分則由李榮浩、林家謙操刀，李榮浩亦特意錄咗條祝賀片添！Eason指希望通過新碟，鼓勵正經歷人生高低起跌嘅人，注入能量、活力！其中作品《社交恐懼癌》嘅劇場版MV喺發布會上首播，國際影帝梁朝偉驚喜客串，令全場嘩然兼掌聲不斷！
偉仔喺MV中飾演一個開鎖工人，成個造型都係由佢自己一手包辦，藍色制服效應，令唔少人覺得有啲似重現《重慶森林》嘅633影子，開鎖後萬人迷偉仔用一個OK手勢，招牌親切笑臉作結，電暈唔少fans！Eason現場自爆本來仲邀請咗張學友演「看更」一角，幻想阿飛與阿基嘅經典畫面，可惜因為疫情關係，改咗好幾次期，學友最終唔能夠出現！
