【Viu】噚晚係Eason陳奕迅嘅尾場紅館騷，睇到全場fans自動波high爆，就梗係嗌收貨啦！老婆徐濠縈、囡囡康堤、陳爸爸、梁漢文夫婦、關智斌、Aga、鄭希怡同囡囡梁浸浸、湯怡、蘇麗珊、釗峰、許廷鏗、劉浩龍等都有嚟捧場！
喺個唱尾聲之際，fans齊齊舉起「多謝你」手幅送Eason驚喜，搞到佢不知所措得嚟又覺得勁感動，但自稱有嚴重散光嘅Eason起初認錯咗自己做欣宜，最後成功被哄一齊大合唱《天下無雙》！而尾場一共encore咗兩次，喺唱《大個女》嗰陣，呢首歌嘅主人康堤喺台下眼濕濕，但講起喊，不得不提呢次係Eason出道20多年以嚟喺台上處男爆喊，即刻笑嘲自己年紀大心情好跳脫。
破個人記錄開27場演唱會後，Eason透露會放個幾月假「交人」，始終一支公喺酒店隔離足一個月都掛住妻女，再之後就會開始跑tour！Eason笑稱呢次開騷每日都要睇住條線做人，自爆有Dancer、樂手曾先後中招，加上把聲曾經「扭計」、右邊膝頭又「抗議」，都有少少心壓壓力，所以順利完騷佢都嗌好感恩！
