【Viu】 Eason陳奕迅相隔六年再到馬來西亞開騷，展開一連三場Fear and Dreams 世界巡迴演唱會。大馬歌迷嘅熱情一時無兩，熱到Eason都忍唔住喺台上大解放，當眾表演除衫，瘋狂叫聲炸裂成個場館。全場歌迷更高舉應援橫幅「特別鳴謝你製造更歡樂的我」，令Eason 非常開心，當中有歌迷大叫：「我老公鍾意咗你好耐！」 Eason仲鬼馬反問：「老公你係咪鍾意你老婆前已經鍾意我？哈哈哈，我勁過你(老婆)，雖然你嫁咗比佢，但係佢鍾意我先！」引爆全場笑彈。 嚟到Encore位，Eason換上T-Shirt都猛咁嗌好熱，連台下歌迷都狂叫佢除衫，佢亦按捺不住除咗件上衣，不過原來佢有備而嚟，T-Shirt下面仲有件白色打底，仲應fans要求將除落嚟嘅衫拋向觀眾席，呢位歌迷得到Eason嘅原味T-Shirt，開心到爆啊！
