0
0
現場實況:陳奕迅自爆第三場台上為歌迷簽CD 返屋企俾老婆扭耳仔

現場實況:陳奕迅自爆第三場台上為歌迷簽CD 返屋企俾老婆扭耳仔

【Viu】E神陳奕迅嘅紅館演唱會眨吓眼噚晚就第九場,吹神大師果然晚晚都有唔同嘅話題同歌迷些牙,而佢亦不斷同台上歌迷吹水,似gathering多過演唱會,場面搞笑。其中有觀眾見E神喺第三場騷時即席為台上歌迷簽唱片,諗住嚟多劑,點知今次俾偶像拒絕,E神話:「你知我好率性而為,但上次簽咗之後,已經俾老婆話  ( 同時做一個扭耳仔動作 ),唔知啲簽名筆掂過咩?不如你帶住喺街啦,2024年或者應該可以,我應該未退休。我知你成晚好投入喺度搖,我入晒心㗎啦,我記得你㗎!」

之後有歌迷大叫E神除衫,佢又搞笑問:「依家仲興㗎咩?的確我係瘦咗少少。」然後就坐地表演Leg Raise crunch ( 下肢挺舉捲腹 ) ,仲hold咗成分幾鐘先起身,真係貪玩到攞你命。為保靚聲E神成晚都keep住飲水,佢又叫觀眾一齊飲,「好乾呀!好似話依家紅館可以食雪糕添!」當有觀眾大叫:「四十蚊呀!」Eason神回,「成千蚊張飛你都買得起,40 蚊個甜筒啫!」笑到有腹肌喇!

另外,監於政府宣布「放寬」部份社交距離措施,演唱會表演場地今日開始放寬座位由85%變返100% 。而E神紅館騷嘅主辦單位亦即時宣布聽朝10點,可以喺城市售票網買到22號其餘15%嘅放寬座位。至於平安夜至1月14號場次嘅放寛位,就喺23號朝十點開始發售,未買到飛嘅仲有機會!

  1. 更多