【viu】Eason陳奕迅聽晚就舉行紅館跨年騷頭場，而新歌《人啊人》MV亦於今日上架！《人啊人》由林家謙作曲、周耀輝填詞、李榮浩編曲，Eason直言收到家謙個demo時，已非常鍾意首歌。而今個MV用咗近廿個鐘拍攝，由朝早九點拍到凌晨近三點先收工，單係吊威也就吊足三個鐘，「吊威也其實都辛苦，唔係講吊得耐唔耐時間，係因為我始終冇受過訓練，核心肌群Core Muscle唔夠力，好多動作，都係靠核心肌群發力，所以我成日喺半空中就自動後空翻，hold唔到好耐。 好彩今次班武指都係以前拍戲、演唱會合作過晒，佢哋好好，不停教我應該點做。」
今次嘅MV對Eason嚟講有好多新嘗試，繼吊威也，又成個人被淋黑漿，又需要跳舞。Eason話：「淋落嚟嘅係似芝麻糊混合類似小朋友玩嗰種口水膠質感嘅嘢，導演話食得嘅。因為一淋咗就冇晒妝頭，所以呢部分放到半夜先拍，淋咗一共四、五次，剩係覺得凍，同自己好似變咗條鱷魚，因為黑漿流咗入對眼，好似有層霧咁，但都幾好玩，我睇相個效果都震憾。」咁震憾嘅效果因為MV係由金像獎新晉導演陳健朗執導。
