【Viu】Kay謝安琪孖老公張繼聰噚日出席「香港社交媒體風雲榜」頒獎禮，佢哋獲封為「2022香港社交媒體風雲人物」，而且仲係最多互動嘅得獎者。張氏夫婦深得網民喜愛，好似早前情人節嗰條穿搭片就俾Fans like爆，Kay爆老公平時其實唔多鍾意試衫，今次咁合作，令佢勁冧咁話已經當條片係情人節禮物喇！不過問到阿聰咁乖是咪可以買新電單車時？阿聰隨即起勢點頭，但當然要睇老婆大人啦，「愛老婆還愛老婆，買電單車還買電單車，唔係表現好先買電單車。」究竟阿Kay又會唔會開綠燈俾老公買新車呢？
講到之後會唔會夫妻檔出歌或開騷，阿聰謙虛話自己係總理式歌手，樂壇位置仲處於新人，唔敢高攀同天后級前輩老婆合作喎！生存指數極高！另外有傳Kay反封殺港台同無綫嘅頒獎禮，佢就話好尊重機制同規則，自己亦有將歌曲派台，想知更多快啲入嚟睇足本訪問啦！
