【Viu】緊貼環保潮流嘅女神Kay謝安琪，今日去到中環碼頭上船宣傳意大利環保服裝品牌，講到佢都有設立自家服裝品牌，最近仲同囡囡Kakaball以爆炸頭look sell母女裝，Kay大讚囡囡表現專業，仲話經過呢次親子拍攝令佢放下為母嗰種強烈保護心，欣賞Kakaball更多、更有信心畀子女接觸大家。
Kay又笑話依家有觀察緊哥哥張瞻有冇心郁郁想影埋一份，係嘅話就再考慮出埋男裝，暫時就吼住老公張繼聰個品牌想crossover，甚至話好眼紅對方個brand深受電單車友歡迎啊。提到張繼聰入圍角逐金馬影帝，Kay自稱係老公最忠實嘅瘋狂影迷，好戥佢開心、滿足，自己聽日亦派新歌，希望為大家帶嚟新鮮感！
