【Viu】雖然噚晚舉行嘅《2022年度叱咤樂壇流行榜頒獎典禮》恍如《全民造星》頒獎禮，但唔少大獎都落係「非造星系」歌手手上。林家謙、Joyce鄭欣宜榮膺男女歌手金獎，Joyce仲蟬聯埋「我最喜愛的女歌手」，成為首個冧莊雙料歌后嘅女歌手，佢大嗌痴線呀，又笑言冧莊最驚嚇怕麻雀腳。不過，Joyce話今次能夠同「老公」Anson Lo齊齊攞獎，開心到不得了，仲口快快以「兩公婆」自稱添喎！
至於連奪5項個人大獎嘅家謙，笑認飲醉後都覺得自己唱歌似鐵閘聲同喃嘸佬，所以覺得網友嘅評論好有趣，仲笑言想推出《心經》系列普渡眾生添，勁大方！
此外，Kay憑《憶年》得到「叱咤十大」第5位時，喺台上爆出90歲老父開始腦退化，佢受訪時亦眼濕濕話希望Daddy唔好忘記自己，有洋蔥呀！
