【Viu】第二屆《香港社交媒體風雲榜》今日喺海港城舉行頒獎禮，謝安琪（Kay）、張繼聰、陳柏宇（Jason）、蘇皓兒、試當真許賢、阿慈同藍仔頭等都有出席。張氏夫婦除咗各自有獎攞，仲係最多互動嘅得獎者，Kay搞笑話平日同阿聰好少互動，早前情人節嗰條穿搭片都應該係只此一次。阿聰喺台上公然話要買多幾架電單車拍片，訪問嗰陣問Kay准唔准老公買車，佢即刻忍唔住反晒白眼，扮鬥氣冤家。
講到佢哋會唔會合體開騷，阿聰話自己仲係樂壇新人：「自己贊助自己唱歌，我要喺樂壇努力啲先可以同貴為天后級嘅阿Kay唱歌。」Kay又忍唔住反白眼，兩公婆真係好搞笑。
Jason同試當真合作拍綜藝大受歡迎，曾經畀人影到訪問嗰陣冇拉褲鏈嘅佢，喺訪問期間發現有記者冇拉褲鏈：「仲唔畀我捉到你哋！」搞到現場個個都笑唔停。至於熊仔頭早前宣佈休息，藍仔頭做訪問嗰陣就笑言自己終於可以上位，同時亦有交代咗熊仔頭嘅近況。
