【Viu】古天樂、劉青雲、劉嘉玲同姜皓文噚晚出席《明日戰記》首映，獲好友吳君如、宣萱、張繼聰、謝安琪同周秀娜等撐場，星光熠熠！
古仔直認因為吊威吔觸及頸部舊患，好彩依家冇咩大礙，亦聽到大馬觀眾「愛的呼喚」，會安排新片去當地上映。講到嘉玲姐今次同全行三位膚色最黑嘅男演員合作，佢大讚朱古力色肌膚好睇，仲報名演出續集；青雲就笑言同古仔合作方便打燈，所以想繼續同佢拍檔。
想報名參演續集嘅又點止嘉玲姐同青雲呢，兩大女神宣萱同娜姐都想演出，宣萱話一人世物一世，就算要著幾十磅盔甲都想挑戰吓喎。對於誤傳古仔因為內地票房而抹淚，宣萱一睇就知冇可能，皆因自己作為幾廿年老友都未見過古仔喊呀，仲嫌對方咩都唔講出口添！
至於阿聰就帶靚老婆Kay拍拖睇戲，笑言會經常「出現」喺古仔面前，務求得到演出機會，好橋喎！
