【Viu】MC噚日(10號)喺IG story度同fans互動玩二選一，其中一條問題「愛你嘅 VS你愛嘅」，MC突然post咗張同女仔拖住手嘅相，仲寫住「我愛嘅」，正當大家想恭喜佢，點知MC就即刻澄清張相N年前，本人單身，MC夜晚開Live嗰陣，都有fans再追問佢有冇對象，答案依然係冇嘅！雖然冇女朋友，但MC都不愁寂寞，事關佢工作忙到爆啊！為咗9月同洪嘉豪嘅演唱會，佢哋都密密開會，MC仲唔小心劇透，同佢嘉豪做咗3首新合唱歌，啲歌仲會有rap嘅部分添！而MC自己首新歌亦都就快會推出，MC仲話已經拍好咗MV，造型仲好似《鐵達尼號》嘅里安納度添，嘩咁咪勁煞食？
MC嘅處男電影都拍攝得如火如荼，MC話個角色比較不修邊幅、粗俗，仲會時不時講粗口，其實同真實嘅自己都有啲似，MC仲自爆比起角色，真實嘅自己爆粗粗得仲勁，特別係打緊機嗰陣，真係好難忍到口！明啊，相信大家都好有同感！另外，MC仲話想同林明禎合作添！
